طريقة تحضير كريم كراميل

مقادير:

    2/ 3 كوب سكر
    1/ 3 كوب ميه

لعمل الكريمة:
    2 كوب لبن
    صفار بيضة
    4 بيضات
    ذرة ملح
    ذرة فانيليا
    2/ 3 كوب سكر

الطريقة:
1- أول حاجة جهزي الكراميل؛ وده بإنك تحُطّي الميه والسكر في حلة صغيرة، وتحطّيهم على نار متوسطة لحد ما السكر يدوب تماما، وبعد ما تتأكّدي إنه داب علّي النار، وسيبيها لحد ما السكر يبقى لونه دهبي.

2- لعمل الكريمة؛ حطّي اللبن على النار لحد ما يغلي، وضيفي عليه الملح والفانيليا، وبعدين ارفعيه من النار وغطيه وسيبيه لمدة 10 دقائق، بعد كده حُطّي عليه السكر وقلّبيه كويس لحد ما السكر يدوب.

3- اضربي البيض وصفار البيض كويس، وحُطّي عليه اللبن وهو دافي، وقلبيهم علشان يمتزجوا كويس.

4- جهزي القوالب اللي هتسوّي فيها؛ وده بإنك تحطي طبقة من الكراميل اللي جهزتيه في كل قالب، وبعدين صُبّي فوقه الكريمة اللي جهزتيها بس ما تمليش القوالب لحد الآخر.

5- رُصّي القوالب في صينية، واملي الصينية بميه سخنة؛ لحد ما توصل الميه لمنتصف القوالب، وبعدين دخليها فرن سخن.

6- سيبيها في الفرن لمدة 25 : 30 دقيقة، وعلشان تتأكّدي إنه استوى ممكن تدخلي فيه سكينة أو خلة، ولو خرجت نظيفة يبقى كده تتأكّدي إنها استوت.

7- ارفعي القوالب من حمام الميه وسيبيها تبرد.. وقدّميها بالهنا والشفا.